Vedtekter for Samarbeidsnemnda for norrøn filologi

 

Utkast per 08.04.2002 ved Else Mundal og Odd Einar Haugen

Føremål og oppgåver

Paragraf 1

Samarbeidsnemnda for norrøn filologi er eit samarbeidsorgan for fagmiljø innanfor universitets- og høgskulesektoren som har ansvar for undervisning og forsking i norrøn filologi. Samarbeidsnemnda kan drøfte og gje tilråding i alle faglege og fagpolitiske spørsmål som gjeld norrøn filologi. Nemnda skal styrkje samarbeidet mellom institusjonane både innanfor undervisning og forsking.

Paragraf 2

Samarbeidsnemnda for norrøn filologi har eit særleg ansvar for å

- sikre rekruttering til forsking i faget og samarbeide om forskarutdanning og forskarrettleiing.

- sikre at universitet og høgskular utdannar kandidatar med nødvendig kompetanse i norrøn filologi for dei stillingar i skuleverket og i samfunnet elles som krev slik kompetanse.

- utarbeide læremiddel for norrøn filologi.

- i den grad det er mogeleg arrangere nasjonale seminar for studentar på høgare grad.

- ta initiativ til felles forskingsprosjekt.

- drøfte og gje tilråding i faglege spørsmål som nemnda tek opp, eller som vert lagde fram for nemnda.

Fråsegner og vedtak frå Samarbeidsnemnda skal sendast til institusjonane som er representerte i nemnda, til dei som har lagt saka fram for nemnda, eller til andre som det er naturleg å vende seg til.

Kopi av referat og fråsegner skal sendast til medlemsinstitusjonane og til generalsekretæren for Universitetsrådet. Så langt råd er skjer dette ved bruk av e-post og eigne nettsider.

Samansetjing og oppnemning

Paragraf 3

Rett til å vere med i Samarbeidsnemnda for norrøn filologi har 1) universitet og høgskular som har norrøn filologi som fag eller som har stillingar i norrøn filologi, vidare 2) universitet og høgskular som innanfor rammene av andre fag gjev undervisning i norrøn filologi som i omfang og kvalitet ligg på same nivå som ved institusjonane i første gruppe.

Paragraf 4

Institusjonar som har ein eller to tilsette i fast stilling i norrøn filologi, oppnemner desse som medlemer i Samarbeidsnemnda for norrøn filologi. Institusjonar som har tre eller fleire tilsette i fast stilling i norrøn filologi, oppnemner to av desse som medlemer i namnda, og ein som varamedlem.

Institusjonar som er representerte i Samarbeidsnemnda for norrøn filologi etter alternativ 2), oppnemner ein representant mellom dei av dei tilsette som har eit hovudansvar for undervisninga i norrøn filologi. Dersom institusjonen har meir enn ein tilsett som underviser og forskar i norrøn filologi, oppnemner institusjonen ein vararepresentant.

Arbeidsutvalet i Samarbeidsnemnda for norrøn filologi kan dessutan invitere vararepresentantane og observatørar til møta.

Paragraf 5

Representantar og vararepresentantar vert oppnemnde for 3 år om gongen. Suppleringsoppnemning skal finne stad dersom ein representant eller vararepresentant ikkje lenger er tilsett ved den institusjonen der han/ho vart oppnemnd.

Paragraf 6

Samarbeidsnemnda for norrøn filologi vel ein formann og ein nestformann mellom dei faste representantane. Desse to vil saman med ein tredje vald representant, som også er sekretær, utgjere arbeidsutvalet. Valet gjeld for tre år om gongen.

Sekretæren har ansvar for drift og vedlikehald av nettsidene.

For særskilde saksområde kan Samarbeidsnemnda nedsetje eigne komitear.

Arbeidsordning

Paragraf 7

Samarbeidsnemnda for norrøn filologi kjem saman annakvart år, dessutan når formannen, arbeidsutvalet eller når minst halvparten av representantane ynskjer det.

Nemda er vedtaksfør når minst 2/3 av representantane er til stades. Vedtak vert gjorde med vanleg fleirtal. Når røystene står likt, er røysta til formannen avgjerande.

Paragraf 8

Samarbeidsnemnda for norrøn filologi skal avgjere prinsipielle saker i plenum, men kan delegere mynde til arbeidsutvalet. Saker som høver til det, kan avgjerast på sirkulasjon.

Paragraf 9

Samarbeidsnemnda for norrøn filologi byggjer arbeidet sitt på desse vedtektene, men kan sjølv gje utfyllande vedtekter.

Paragraf 10

Endringar i vedtektene kan gjerast når minst 2/3 av representantane i Samarbeidsnemnda for norrøn filologi røystar for. Melding om vedtaksendringar skal sendast til dei institusjonane som er representerte i namnda.

Paragraf 11

Samarbeidsnemnda for norrøn filologi kan gjere vedtek om oppløysing med 2/3 fleirtal. Forslag om oppløysing må vere varsla to månader før møtet.

 

Publisert 15. nov. 2016 15:50 - Sist endret 22. aug. 2022 13:05